ईशान बाल अस्पतालमा १३ वर्षीया बालिकाको दुर्लभ मानिने प्याङक्रियाज ट्युमरको सफल शल्यक्रिया

काठमाडौं । ईशान बाल तथा महिला अस्पतालमा दुर्लभ मानिने प्याङक्रियाजको हेड सर्जरी सफलतापूर्वक गरिएको छ।

सर्लाही घर भएकी १३ वर्षीया सोनी कुमारी पटेलको जटिल किसिमको ट्युमरको शल्यक्रिया गरिएको अस्पतालले पत्रकार सम्मेलन मार्फत् जानकारी दिएको छ ।

बालिकालाई निक्कै पेट दुख्ने, वान्ता हुने तथा खाना नरुच्ने समस्या भएपछि उनका बुबा छोटेलालले उनलाई नजिकैको औषधि पसलमा गएर औषधि किनेर खुवाए । उनलाई निको भएन,त्यसपश्चात् नजिकैको स्वास्थ्य संस्थामा गएर जाँच गराएपछि उनलाई बाल सर्जरीको चिकित्सकलाई भेट्न सल्लाह दिइयो । उपचारको क्रममा ईशान बाल तथा महिला अस्पतालमा आएपछि इन्डोस्कोपी तथा भिडियो एक्सरे पश्चात् उनको समस्याको पहिचान भएको थियो ।

समस्याको पहिचानपश्चात् डा.आरपी चौधरीको नेतृत्वमा डा. राकेश कुमार शाह,डा.सञ्जय कुमार शाह,डा.अकानन्द शाह,तथा डा.किरण मगरको टोलीले उनको सफल शल्यक्रिया गरेको थियो । उक्त शल्यक्रियालाई ह्वििपल प्रोसिडुयर भनिन्छ ।

शल्यक्रियाको क्रममा आन्द्राको केही भाग पित थैली,पित्त नली र ट्युमर भएको प्याङक्रियाजको भागलाई काटेर फालिएको डा.आरपी चौधरीले बताए । उक्त ट्युमर पेटको र आन्द्राको रगतको ठूला ठूला नसाहरुसँग टासिएको थियो । यस्तो प्रकारको शल्यक्रिया ईशान बाल अस्पतालले गरेको यो दोस्रो पटक हो ।
Source:https://mahilaswasthya.com