प्रा.डा आरपी चौधरीको नेतृत्वमा ईशान बाल अस्पतालमा भेन्टिलेटरसहितको कोभिड वार्ड संचालन

काठमाडौ, पछिल्लो समय बालबालिकामा कोरोना संक्रमण बढी देखिन थालेपछि काठमाडौंको बसुन्धरामास्थित ईशान बाल तथा महिला अस्पतालले बालबालिकाका लागि भेन्टिलेटरसहितको कोभिड आइसोलेसन वार्ड सञ्चालनमा ल्याएको छ ।

अस्पतालका निर्देशक प्राडा आरपी चौधरीले निजी क्षेत्रमा इशान नै पहिलो अस्पताल भएको बताए । आफ्नो अस्पतालमा आउने बालिबालिकामा कोरोना संक्रमण देखिंदा कहाँ पठाउने भन्ने ठूलो चिन्ता हुने र त्यसले अभिभावक र बिरामी बच्चा दुबैमा अप्ठेरो परेको देखेर आफूहरुले बच्चाको उपचारमा सहज होस भनेर कोभिड वार्ड सुरु गरेको डा.चौधरीको भनाई छ ।

उनले अहिलेलाई ८ बेडको आइसोलेसन वार्ड २ वटा भेन्टिलेटरसहितको सेवा सुरु गरेको जनाए । कोभिड र नन -कोभिड बच्चाहरुको उपचार एकै ठाउँमा गर्दा व्यवस्थापनमा समस्या धेरै हुने भए पनि हामीले यसलाई कर्तव्य ठानेर नै सेवा सुरु गरेका हौं उनले थपे । उनले कोभिड वार्ड बनेदेखि ८ जना संक्रमित बच्चाले सेवा लिएर निको भएर घर गइसकेको बताए।

आइसोलेसन वार्डमा काम गर्ने सफाइकर्मीदेखि, डाक्टर, स्वास्थ्यकर्मी सबै अलग्गै भएको समेत डा. चौधरीले जानकारी दिए । अस्पतालको छैटौं तलामा कोभिड वार्ड संचालन गरिएको हो ।